Двете владејачки партии (ВМРО-ДПМНЕ и ДУИ н.з.), како и претходно, така и сега ги заземаат своите националистички позиции, изјави денеска лидерот на СДСМ, Зоран Заев, во одговор на новинарско прашање.
Заев упати апел до сите граѓани во земјава, без разлика на верската, етничката и на политичката припадност, да не потклекнуваат на провокациите.
– Ова личи само на провокација. Ги повикувам граѓаните да не паѓаат на никакви провокации од кого било. Ги осудувам јавно поделбите по која било основа во Македонија и начините на кои се предизвикуваат. Поделби не ни се потребни. Апелирам до носителите на одлуките да не прават вакви чекори со кои се провоцираат граѓаните. Да не дозволиме да го изгубиме тоа на што сите заедно се радуваме, а тоа е дека само единствено и сплотено можеме да ја градиме иднината на нашата заедничка Македонија – рече Заев.
За денеска во 17 часот, поддржувачите на ДУИ закажаа мирен протест против изградбата на крстот во општина Бутел.
Во саботата минатата недела, по поставувањето на темелите за крстот, во ресторан беше претепан претседателот на Светскиот македонски конгрес (СМК), Тодор Петров, кој е донатор за поставувањето на 52-метарскиот крст.
Пред неколку недели, во Чаир беше поставен споменик со двоглав орел, а како што пренесоа дел од медиумите, се планира поставување 50-метарски јарбол со албанското знаме во Сарај.