Вооружен напаѓач уби 13 лица, вклучувајќи седум деца, и рани уште 21 лице во училиште во централна Русија, соопштија денеска тамошните власти.
Рускиот Истражен комитет соопшти дека пукотниците се случиле во училиште во Ижевск, град кој е оддалечен 960 километри од Москва, во регионот Удмуртија, објавија светските агенции. Како што соопштил Комитетот, од ранетите 14 се деца, а 7 се возрасни.
Градоначалникот на Удмуртија, Александар Бречалов, во видео-изјава посочил дека сè уште неиндетификуваниот напаѓач се самоубил.
Во ова училиште настава посетуваат ученици од 1 до 11 одделение во рускиот образовен систем. Областа околу училиштето е евакуирана и поставен е кордон, посочил градоначалникот.
Според Истражниот комитет, напаѓачот носел црна маица со „нацистички симболи“. Нема повеќе детали за напаѓачот или неговиот мотив.
Ижевск е град со 640.000 жители лоциран западно од Уралските планини во централна Русија.