Здравствените власти денеска прогласија епидемија на болеста туларемија во општина Лозово, каде бројот на заболени достигна 11 лица, пренесува „Телма“.
Новозаболени лица од туларемија се регистрирани и во Грушино и во Арачиново, кои се водат како второ жариште на болеста, а туларемија била дијагностицирана и кај жител на кумановското село Опае.
Вкупниот број на заболени, со новите случаи од вчера до денеска, изнесува 19 лица.
Комисијата за заразни болести, како што пренесува „Телма“, денеска на општините им наложила да ги исчистат објектите за снабдување со вода и санитарните јазли околу нив. Во Каратманово наредните 10 дена водата ќе се хлорира со специјални таблети.
Исто така, формирано е и координативно тело, составено од членови на Комисијата за заразни болести, чија задача е секојдневно да ја следи состојбата и да проверува дали мерките се спроведуваат на терен.