На својата трета седница за годинава, денеска Уставен суд го отфрли барањето да се поништи Преспанскиот договор, поднесено од професорката Тања Каракамишева во 2019 година.
Каракамишева побарала „заштита на слободите и правата“, односно навела дека е „повредено правото на забрана од дискриминација по основ на национална припадност и правото на слобода на уверување, совеста, мислата и јавното изразување на мислата од член 110 став 1 алинеја 3 од Уставот, гарантирани со меѓународни документи“.
Каракамишева смета дека повредата на правата е направена со потпишувањето на Преспанскиот договор од тогашниот министер за надворешни работи Никола Димитров, но и со стапување на сила на Договорот, со измената на Уставот согласно Преспанскиот договор, но и со „формирање административен заеднички интердисциплинарен комитет за цензура и слобода на говорот, дејствата на согласување на државата под странски притисок на дополнителни услови за прием во ООН“.
Таа од Уставен суд побарала да утврди прекршување на правата и слободите и да го поништи Преспанскиот договор и да се забранат сите дејствија што произлегуваат од него.
Барањето на професорката е отфрлено бидејќи, како што вели судијата – известител Осман Кадриу, Уставниот суд може да решава за повреда на конкретни слободи и права, но ако тие се повредени со поединечен акти или дејствие. Во случајот, Преспанскиот договор и преземените дејствија во сите фази не се индивидуални дејствија, но побитно е тоа дека Договорот е општ акт со материја од правна и политичка природа со која се решаваат државни интереси за добробит на сите граѓани и целата држава. Според тоа, не постојат услови Уставниот суд да решава за тоа прашање, посочи Кадриу.