Управниот суд го поништи решението на Комисијата за верификација на фактите за лустрација на новинарката Јадранка Костова, главен уредник на неделникот „Фокус“.
Решението за лустрација на Костова беше донесено на 26 март 2015 година. Неколку месеци подоцна, парламентарното мнозинство изгласа прекинување на процесот на лустрација. Конкретно, од 1 септември 2015 година, Комисијата нема мандат да поведува нови постапки.
Пресудата со која Управниот суд го поништува решението за лустрација на Костова, од судот ја објаснуваат со фактот дека е прекршен членот 31, став 3 од законот, кој налага задолжително да биде известено лицето за кое се врши проверка, со што „му се овозможува активна улога во утврдување на сите факти и околности од важност за утврдување на материјалната вистина како основа и услов за правилна примена на материјалното право“.
Против оваа пресуда дозволена е жалба до Вишиот управен суд во рок од 15 дена од приемот.