Корона вирусот го зеде животот на уште еден медиумски работник. Синоќа почина 51-годишниот Шенол Ахмети, долгогодишен снимател во албанската редакција на Македонската радио-телевизија, каде го помина целиот свој работен век, повеќе од 20 години.
Ахмети се заразил со ковид-19 и пред една недела бил хоспитализиран, а за само неколку дена состојбата му се влошила и завршил на респираторна машина. Колегите од МРТ се простуваат од својот колега, со емотивни пораки на социјалните мрежи.
Снимателот Ахмети е втората жртва на ковид-19 меѓу медиумските работници во земјава. Пред точно еден месец, 44-годишниот Беким Бајрамоски, вработен во локалната телевизија „Спектра“ во Лабуништа, исто така почина како последица на корона вирусот.