Силвана Бонева од Државната изборна комисија за шест месеци зела 12.000 евра за патни трошоци, објави телевизија „Алсат“. Бонева вели дека исплатата е според законот.
– Сè е исплатено согласно законот – вели Бонева.
ДИК од декември до јуни на нејзините членови за патни трошоци им исплатила вкупно 25.000 евра.
По Бонева, најмногу пари зел Атанас Урумов. кој е од Гевгелија и добил 6.800 евра. Бедредин Ибраими, кој доаѓа од Тетово, зел 3.000 евра, а Субхи Јакупи од Гостивар – 2.000 евра. Реџеп Прекопуца добил 500 евра, Игор Милев – 370 евра, а Александар Чичаковски потрошил 150 евра. Виолета Дума и Сашо Срцев не зеле пари за патни трошоци.
Силвана Бонева беше на удар на јавноста и претходно, кога медиумите објавија дека како пратеничка за само една година, за патни трошоци зела 23.000 евра.