Втора година по ред Северна Македонија е на 31-во место од 49 земји на годишниот извештај за состојбата со човековите права на ЛГБТИ луѓето „Rainbow Europe“ на организацијата „ИЛГА Европа“.
Според извештајот во шест категории, Македонија е рангирана со 27% од вкупно 100% во однос на постигнатите права за ЛГБТИ заедницата.
За правната и политичката ситуација на ЛГБТИ луѓето во земјава да се подобри, во документот се препорачува усвојување на правична и транспарентна правна рамка за признавање на родот, заснована на процес на самоопределување и ослободена од навредливи барања.
„Воведување закони за говор на омраза кои експлицитно ги покриваат сите злосторства мотивирани од пристрасност врз основа на сексуална ориентација, родов идентитет, родово изразување и полови карактеристики. Усвојување ажурирани акциони планови за еднаквост кои изрично ги споменуваат сите основи на сексуална ориентација, родов идентитет, родово изразување и полови карактеристики“, е наведено во делот со препораки.
Од земјите во соседството, полошо рангирана е само Бугарија која се наоѓа на 40. место. Најдобро рангирана е Грција која е на 17-то место, Албанија се наоѓа на 28-мо место, Косово на 25-то место, а Србија е на 23-то место.