Фондот за здравство ќе го зголеми капитацискиот бод за стоматолозите од 35 на 40 денари, односно за 14 проценти, од 1 јануари 2016 година.
Средствата се обезбедени од буџетот на Фондот за 2016 година, а фискалната импликација во делот на зголемување на капитацијата за стоматолози ќе биде 75,3 милиони денари годишно.
– Фондот за здравствено осигурување издвојува значителни средства за дејноста стоматологија и за тоа во буџетот за 2015 година беа предвидени и ќе бидат исплатени 524 милиони денари. Со зголемувањето од 2016 година за 75,3 милиони денари, Фондот ќе исплаќа 599,3 милиони денари годишно за матичните стоматолози – информираат од Фондот.
Добробит од оваа мерка ќе почувствуваат 1.146 тимови на стоматолози што работат во 963 ординации со кои Фондот има склучено договор во 2015 година.