Претседателот на СДСМ, Зоран Заев, вечерва добил едногласна поддршка од коалициските партнери од здружената опозиција да не учествуваат на изборите на 24 април.
„СДСМ и коалициските партнери се одлучни за спроведување фер и демократски избори. Избирачкиот список мора да се прочисти. Мора да се обезбеди професионално известување на медиумите. Само такви избори се во интерес на граѓаните и на Македонија и само на такви избори ќе учествува опозицијата. За СДСМ и за коалициските партнери не се прифатливи избори на 24 април. СДСМ и здружената опозиција нема да учествуваат на избори организирани на 24 април“, велат од СДСМ.
Во врска со учеството на министрите и на замениците-министри на опозицијата во Владата, констатирано е дека таа одлука е донесена од централните органи и тела на партиите од здружената опозиција. Од СДСМ информираат дека централните органи и тела на партиите од здружената опозиција штом ќе донесат одлука за учеството во Владата, таа ќе ѝ биде соопштена на јавноста.