Дневната евтина тарифа започнува на 1 декември, и ќе трае секој ден во периодот од 13 до 15 часот, одлучи Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ). Оттаму информираат дека го усвоиле тарифниот систем за продажба на електрична енергија со кој се воведува евтина тарифа.
„Со воведување на дневната евтина тарифа домаќинствата ќе имаат на располагање вкупно 11 часа евтина електрична енергија во текот на едно деноноќие од понеделник до сабота и 24 часа во ден недела. РКЕ по направените анализи оцени дека се создадени услови домаќинствата да користат дополнителни часови во коишто надоместокот за потрошената електрична енергија ќе се пресметува по евтина тарифа. Податоците укажуваат дека инвестицискиот циклусот во обновливи извори на енергија го зголеми производството на електрична енергија со што директно се влијаеше врз намалување на цената преку ден“, изјави Марко Бислимоски, претседател на РКЕ.
Подзаконските акти што ги донесе РКЕ утврдуваат и нови рокови според кои енергетските компании од следната година ќе треба да ги достават своите барања најдоцна до 30 септември, а одлуките за новите тарифи ќе бидат соопштени најдоцна до 30 ноември и истите ќе бидат на сила од следната година.
Од 1 декември домаќинствата ќе имаат ниска тарифа за електрична енергија од 13 часот до 15 часот и од 22 часот до 7 часот секој ден, како и цел ден недела.