Денеска се одржа пригодна церемонија по повод свечената Промоција на нови полициски службеници – генерација 2023-2024 година, во Центарот за обука на МВР во Идризово, на која покрај раководството на МВР, присуствуваа и Премиерот на РСМ Талат Џафери и претставници на дипломатскиот кор во земјата.
„Ви посакувам да бидете непоколебливи во безусловното исполнување на нормираните должности и етичките вредности потврдени низ традицијата и опстојувањето на нашиот народ. Впрочем, вам треба да ви биде јасно дека граѓаните токму тоа го очекуваат од вас, но и од сите нас. Особено што сум уверен дека македонската полиција, има потенцијал, пред сè човечки, за натамошно справување со сите предизвици и закани во име на целосното воспоставување на современи демократски и професионални стандарди на работење“, истакна министерот Тошковски.
Дополнителниот заменик министер за внатрешни работи Митко Бојмацалиев во своето обраќање потенцираше дека полициската професија секојдневно е исправена пред многу предизвици на кои полициските службеници треба веднаш да одговорат согласно законските прописи, но истовремено претставува благороден животен пат достоен за гордост и почит со секој постигнат резултат како сервис на граѓаните, со секој успешен подвиг како гарант на безбедноста.
„Патот на создавање добар полициски службеник бара посветеност, одговорно и домаќинско работење. Ние како раководство на МВР сме тука да ги обезбедиме сите потребни ресурси и поддршка да ви овозможиме сè што е потребно за достоинствено извршување на вашите работни задачи, а ваша должност како идни колеги и вработени во МВР, ќе биде да се грижите за безбедноста на сите граѓани и државата“, рече Бојмацлиев.
Тој рече дека се реконструирани 82 на МВР ширум државата, во кои се имплементини и мерки за енергетска ефикасност, а покрај ова, инвестирани се 10 милиони евра во нови униформи за секоја организациона единица.
Претседателот на Владата на Република Северна Македонија, Талат Џафери во своето обраќање ги охрабри новите полициски службеници да бидат чесни и посветени во спроведувањето на своите должности кон граѓаните и горди на својата работа.
„Сите граѓани се еднакво исти пред законот и имаат еднакво исто право на безбедност. Како идни полициски службеници, очекувам преку сопственото поведение и труд да покажете дека, полицијата како институција е професионална, и успешно ги остварува своите законски надлежности и задачи“, истакна премиерот Џафери.
Помошник министерот на Центарот за обука, Сузе Трајковска информираше дека основната обука за полицаец започна на 23 април 2023 година, со вкупно 538 кандидати, а денес, обуката успешно ја завршуваат 508 кандидати, 416 од машки пол и 92 од женски со среден успех на генерацијата од 541 бодови од можни 600.
На церемонијата беа доделени плакети за 16 најдобри тимови од оваа генерација, а за најдобар од генерацијата 2023/2024 беше прогласен Андреј Тодороски, на кого му беше доделена свечена плакета од претседателот на Владата, а доби и пригоден подарок од Македонскиот полициски синдикат, по што сите кандидати за полициски службеници од генерацијата 2023-2024 дадоа свечена изјава.