Комисијата за заразни болести ќе препорача до Министерството за здравство повторно задолжително да се носат маски во здравствените установи како превенција од ковид-19.
„На денешниот состанок се разгледуваше состојбата со ковид-19 и по деталните анализи што ги направивме, се донесе само една препорака, односно повторно задолжително користење маски во здравствените установи. Ова е пред сè за да не се пренесува заразата онаму каде што има вулнерабилни групи и кај кои може да се јави летален исход“, рече Злате Мехмедовиќ, портпарол на Комисијата.
Тој рече дека бројката на заразени со ковид-19 е низок, односно во август биле дијагностицирани 112 лица. Во моментов се хоспитализирани 7 лица, од кои дел се на кислородна поддршка.
Мехмедовиќ информираше дека засега нема препораки за маски во јавниот превоз и домовите за стари лица и лицата со посебни потреби, а околу носењето на маски во аптеките, Мехмедовиќ појаснува дека во тие објекти, препораките се неформални.