Вирусни инфекции кои во најголем дел ги напаѓаат горните дишни патишта, ги полнат амбулатнтите со пациенти од сите возрасти. Освен амбулантите, полни се и собите во Институтот за белодробни заболувања во Козле, каде што има капацитет од 20 болнички легла. Како што за Мета.мк вели директорот д-р Беким Зеќири, во собите има по два кревети, а тие се принудени да ставаат и трет кревет, за да може да бидат примени сите дечиња на кои им е потребно болничко лекување.
„Имаме многу деца кои во моментов се хоспитализирани. Капацитетот е исполнет во последниве три-четири недели. Сите доаѓаат со горни респиратони проблеми, односно со затнати носеви, отежнато дишење, кашлање. Има и такви што се лекувале, но со погрешна терапија, по што се спуштила инфекцијата на белите дробови“, информира Зеќири.
Хоспитализацијата во Козле трае од 7 до 10 дена, а лекувањето е најчесто со кортико и антибиотска терапија. Директорот очекува со падот на температурите да се намали бројот на хоспитализации.
„Ако имаме снег, тоа би требало малку да ги смири вирусите“, додава Зеќири.
Д-р Мира Атанасова педијатар, вели дека има пациенти од сите возрасти, и претшколска, до 6 години, и од 7 до 14 годишни ученици, како и средношколци и студенти. Периодов сите кои се обраќаат за помош имаат вирусни симптоми од гребење во грло, кивање, кашлање, зголемена температура, но таа вели дека загрижува што целата симптоматологија се пролонгира и подолго трае, што за лекарите е неочекувано.
„Даваме симптоматска терапија, не брзаме со антибиотици. Ковидот ни покажа дека Д витамин треба да се зема бидејќи научно е докажано дека е борец со вирусите. Кај тинејџерите и адолесцентите има вируси, но и омикрон. Луѓето веќе не се тестираат, не сакаат да се проверуваат, а сега имаме термини за тестирање за без пари. Омикронот е со полесна клиничка слика, гласот е зарипнат, но не се спушта на белите дробови“, вели д-р Атанасова.
Инаку, кога станува збор за состојбата со ковид во државата, според последните информации на Институт за јавно здравје, во периодот од 5 до 11 декември, регистрирани сe 130 нови позитивни случаи од 12 градови во државата, што е намалување од 33,3 отсто во однос на минатата недела.