Министерот за надворешни работи во заминување, Никола Попоски, денеска ќе учествува на министерскиот состанок на Глобалната коалиција за борба против Исламска држава во Вашингтон.
Попоски на состанокот, кој ќе се одржи во Стејт департментот, учествува на покана на државниот секретар на САД, Рекс Тилерсон, соопштуваат од Министерството за надворешни работи.
„Министерскиот состанок има цел да се поттикне интензивирање на меѓународните напори во борбата против Исламска држава во одделни области во Ирак и во Сирија кои сé уште се под нејзина окупација, да се зголеми притисокот и да се ограничи нејзината мрежа на функционирање“, стои во соопштението на МНР.
Во рамките на посетата, додаваат од министерството, Попоски ќе оствари и бројни билатерални средби.