Шест словенечки полициски службеници денеска почнаа со работа на македонско-грчката граница, соопштија од Амбасадата на Словенија.
Како што пишува во соопштението, полицајците ќе ги извршуваат своите обврски заедно со македонската гранична полиција на подрачјето, кое го покрива полициската станица за гранични проверки и за граничен надзор Богородица.
„По потреба ќе им помагаат и на македонските колеги во процесот на регистрација на бегалците во привремениот транзитен центар Гевгелија. Во работата, покрај опремата и возилата, со кои вчера допатуваа од Словенија, ќе им помагаат и двете полициски кучиња Пан и Бојко. Словенија во рамки на своите можности, одговори на барањето на Македонија за материјална и за логистичка помош при справувањето со бегалската криза што го зафати регионот“, се вели во соопштението.