Стотина планинари попладнево ја освоија највисоката точка на Шар Планина Титов Врв, кој се наоѓа на надморска височина од 2747 метри.
Планинарската тура во која учествуваа планинари од Македонија и Балканот, тргнаа од Попова Шапка рано наутро и за неполни пет часа по патека долга 15 километри, стигнаа до целта.
– Планинарењето по овие предели е покарактеристично од другите планини. Специфичноста на овој предел е неговата разноликост, каде има голем број извори, карпести предели, остатоци од снег, езерца. Од овој масив можат да се видат широките пространства на Шар Планина, од каде се гледаат и останатите врвови, кои се на надморска височина над 2500 метри- изјави Снежана Новаковска од планинарскиот клуб „Тетекс“.
Денешното искачување на Титов Врв е традиционално. Беше организирано по седми пат од планинарските клубови „Јелак“ и „Тетекс“.