Настрада културното богатство од археолошкиот локалитет Баргала кај Штип. Искршени се десетина земјени садови, кои датираат од четвртиот до шестиот век од нашата ера. Садовите биле искршени и покрај тоа што локалитетот има 24-часовна чуварска служба. Директорот на Заводот и музеј од Штип, Зоран Читкушев, вели дека не може да разбере од какви мотиви се водени луѓето што уништуваат културно наследство.
– Поради неодговорност и за мене некои несфатливи мотиви, се оштетува нашето културно наследство. Имено, оштетени се земјени садови кои датираат од четвртиот до шестиот век од нашата ера. Значи се работи за едно сериозно културно наследство кое нашата установа веќе почна да го реконзервира – вели Читкушев.
Вандализмот го потврдија и од штипската полиција.
– Вчера во 14.30 часот во полициската станица е пријавено оштетување на 12 земјени садови кои биле поставени како експонати во археолошкиот локалитет Баргала. Полициски службеници извршиле увид на место на настанот и се работи на целосно расчистување на случајот – информираше портпаролката на СВР Штип, Гордана Панајотова.
Ова е втор случај на ваков вандализам во изминатите 10 години. Општината Карбинци ги плаќа чуварите, кои ќе треба да одговорат како се случил вандализмот.