Избраните пратеници денеска во 13 часот се собраа на конститутивната седница на новиот состав на Собранието на Република Македонија. Седницата ја отвори и со неа претседава претседателот на Собранието во заминување, Трајко Вељаноски, кој за свои заменици ги назначи пратениците Стојан Миланов и Јусуф Хасани.
По прозивката на пратениците, беше констатирано дека на седницата се присутни 118 од вкупно 120 избрани пратеници. На седницата единствено не се присутни двајцата пратеници на ДПА, Мендух Тачи и Бардуљ Даути.
Оливер Спасовски од СДСМ реагираше процедурално, посочувајчќи дека според пратеничката група на СДСМ, седницата треба да ја води највозрасниот пратеник, а не Вељаноски. Тој се повика на практиката од конституирањето на претходните два парлементарни состави, во 2011 и во 2014 година, нагласувајќи дека со нив не претседавал Вељаноски, туку највозрасниот пратеник.
На ова Вељаноски кусо реплицираше дека практиката и деловникот се две различни работи и дека предност има деловникот.
По ова пратениците го изгласаа составот на Верификационата комисија, за чиј претседател е избран Владимир Ѓорчев, а членови се Петре Шилегов, Фадил Зендели, Реџаиљ Измаили и Шурије Рашиди.
Вељаноски даде пауза за да може комисијата да го подготви извештајот за верификација на мандатите на пратениците.