Три нови наслови од едицијата „Македонски искушенија“ промовираше денеска Министерството за култура. Тоа се нови три тома од шесттомната публикација „Македонија до 19 век“ и книгите „Цар Самоил“ и „Букурешкиот мировен договор – 1913 година“. Автори се професори, историчари и проучувачи на македонската историја од различни генерации.
Целта на овој проект на Владата е со научно верификувани факти и аргументи да се толкува долгата историја на македонската борба за државност и за самостојност. Врз основа на овие историски текстови се снимени и документарни филмови, кои се прикажуваат на Македонската радиотелевизија.
Премиерот Никола Груевски истакна дека со овие изданија се расветлуваат личности и настани од македонската историја за кои не се знаело или биле маргинално обработувани и дека квалитетно се исполнува празнина во македонската пишувана историја.