Министерството за внатрешни работи (МВР) од 2017 година до денес поднело 919 кривични пријави за нелегална сеча на дрва и пустошење на шуми, информираше денеска министерот за внатрешни работи Оливер Спасовски во телевизиски прилог на јавниот сервис МТВ.
Спасовски информираше дека покрај превентивни мерки, сериозно се работи и на репресивни мерки на откривање нелегална сеча на шуми.
„Сега започнавме и со надзор практично на шумските предели со Одделот за воздухопловни единици. Заедно со специјалните полициски единици тие се движат на потенцијални места каде имаме дојави дека има опустошување шума и директно ги затекнуваме и фаќаме на лице место. Имавме неколку акции во Скопје, Струга… Тоа е еден модус операнди на којшто работат полициските службеници, да можеме на моменти каде што тие се наоѓаат, на местата каде вршат нелегална сеча – на лице место се затекнуваат и тука практично ги обезбедуваме сите докази за ова кривично дело“, изјави министерот за внатрешни работи Спасовски.
Според статистиката на МВР, од 2017 година до првото полугодие од 2023 година во рамките на оперативните активности, поднесени се 919 кривични пријави за вкупно 1.150 кривични дела поврзани со бесправна сеча на шуми, пријавени се 1.439 сторители, а запленети се 97.000 метри кубни дрва.