Синоќа, околу 22 часот, дежурен лекар во тетовската болница пријавил дека во тоалетот на интерното одделение пронашол мртво новородено бебе, покриено со пелени, информира полицијата.
Јавен обвинител, екипа на тетовската полиција и доктор по судска медицина извршиле увид на местото, а телото на бебето било однесено на одделот за судска медицина.
Од полицијата информираат дека по извршениот разговор со дежурните лекари од интерното и од гинеколошкото одделение на болницата било утврдено дека околу 16 часот, на интерното одделение била примена 36-годишната С.Н. од селото Групчин, која по кратко време, поради дијагнозата, била препратена на гинекологија.
Според лекарите, С.Н. имала спонтано породување бидејќи пронајденото бебе одговарало на шести месец од бременоста, а и добиениот материјал од утерусот укажувал дека таа се породила.
Од друга страна, пак, С.Н. и нејзиниот сопруг, 42-годишен сопруг Е.А., тврделе дека таа воопшто не била бремена и дека не се породила.
Од полицијата информираат дека „местото на настанот е фотодокументирано и земени се брисеви за ДНК-анализа, а Секторот за внатрешни работи Тетово презема мерки за целосно расчистување на случајот.