Поради бојкот на работата од страна на машиновозачите, од денеска во 13 часот во прекин е патничкиот и товарниот железнички сообраќај во земјава. Железничарите бараат од раководството на Железници на РСМ-Транспорт исплата на вториот дел од платата за јуни, но и покачување на коефициентите.
Бојкотот на машиновозачите резултира со прекин на сообраќањето на патничките и товарните возови во земјава, а ваквата ситуација ќе продолжи до моментот на исполнување на барањата на железничарите, информираа од Синдикатот на машиновозачите.
Поради енормните долгови што се трупаат со години наназад и нерентабилното работење на државното акционерско друштво, Железници на РСМ-Транспорт веќе подолг период наназад има потешкотии во исплаќањето плати на своите вработени. Како резултат на доцнењето на исплатата на платите, машиновозачите и останатите железничари во неколку наврати досега го блокираа железничкиот сообраќај.