Сите нејаснотии околу одлуката за забрана за прием на деца во градинките во државата без примена ДиТеПер вакцина, ќе бидат разгледани и разјаснети утре на вонреден состанок на членовите на Комисијата за заразни болести. Ова денеска го изјави министерот за здравство Илир Демири, после реакциите на родители чии деца се одбиени за прием во градинка, односно не ги примаат додека чекаат термин за ревакцина.
„Секој коментар кој ќе го даде Комисијата за заразни болести за ваквата состојба јас ќе го почитувам како министер. Ги повикувам родителите да бидат трпеливи. Жалам што одредени деца се вакцинирале со задоцнување, па сега има реперкусии“, рече тој.
Според него, ако детето е вакцинирано, нема причина да се спречуваат да посетуваат градинка. Демири кажа дека членовите на Комисијата како и Државниот санитарен и здравствен инспекторат, треба да кажат дали децата кои немаат ревакцина може да одат во градинка.
„Многу е важно да се внимава на сензибилитетот на кампањата за вакцинација затоа што се работи за здравје и за животи. Загрижувачки е податокот дека имаме 14.000 нецелосно вакцинирани деца во градинките во време на епидемија“, рече тој.
Во некои градинки, родители на одбиени деца за прием биле упатувани во вакциналните пунктови, да побараат упат до т.н. Комисија за имунологија на Детската клиника, каде што наводно ќе им била издадена специјална потврда, со која ќе може да посетуваат градинка. Мета се обрати на Детската клиника каде што ни рекоа дека денеска многу родители доаѓале по ваква потврда, но залудно, бидејќи ваква Комисија во рамки на Клиниката, не постои.
Од Центарот за јавно здравје – Скопје денеска информираа за нови 11 случаи во текот на едно деноноќие. Некои од заболените биле вакцинирани, а некои биле делумно вакцинирани. Најмалото дете со потврден пертусис има 4 години, а највозрасниот – 44 години.