Ако вечерва Собранието се распушти, според Уставот, изборите мора да се одржат во рок од 60 дена – на 5 јуни. Собранието може да работи до вечерва по полноќ, по што спикерот Трајко Вељаноски треба да констатира распуштање.
Ситуацијата дополнително ја заплеткаа техничките министри и дополнителните заменици министри од СДСМ кои денеска поднесоа оставки на функциите во Владата.
Собранието треба нивните оставки да ги констатира во наредните седум часа.
Еве кои други датуми и термините треба да се испочитуваат:
- 17 април – Државната изборна комисија мора да го стави избирачкиот список на јавен увид;
- 6 мај – Државната изборна комисија треба да ги објави описите на изборните единици;
- 12 мај – Завршува јавниот увид во избирачкиот список;
- 13 мај – Треба да бидат објавени листите на пратеници во дневниот печат;
- 16 мај – Почнува изборната кампања која ќе заврши на 4 јуни;
- 17 мај – ДИК ќе им го достави избирачкиот список на политичките партии, а тие, пак, во рок од пет дена, до 19 мај, мора да достават барање за запишување, дополнување или бришење податоци;
- 21 мај – ДИК го потпишува избирачкиот список, односно изводите од избирачкиот список на кои се гласа;
- 2 јуни – Државната изборна комисија треба да го предаде изборниот материјал на општинските изборни комисии;
- 4 јуни – Општинските изборни комисии се должни да го предадат изборниот материјал на избирачките одбори на територијата на Република Македонија;
- 4 јуни – Завршува изборната кампања;
- 5 јуни – Ден на предвремени парламентарни избори.