Американскиот државен секретар, Џон Кери, денеска во Тирана го пофали придонесот на Албанија во меѓународната коалиција, предводена од САД, која ги напаѓа позициите на Исламска држава во Сирија и во соседен Ирак.
– Живееме во време на глобални предизвици. Албанија тоа го сфатила и нејзината улога е особено важна во рамки на помошта на САД во борбата против насилниот екстремизам – рече Кери по разговорот со албанскиот премиер, Еди Рама.
Кери рече дека Исламска држава не може да се порази само со заложби на една држава, туку за тоа е потребна коалиција од повеќе земји.
Албанија е членка на НАТО од 2009 година, а во 2014 година испорача големо количество оружје и муниција на курдски сили во борбата против ИД на северот на Ирак.
Кери денеска накратко престојуваше во Тирана на пат кон САД, по неколкудневната безбедносна конференција во Минхен.