Во резерватот за животни во Тасманија е одржана роденденска прослава за какадуто Фред, кој наполни 100 години. Папагалот добил многу честитки, вклучувајќи ја и таа од Бакингемската палата.
Фред речиси 20 години живее во резерватот Боногронг. Вработените од резерватот, по повод роденденот, му донесоа бела торта во облик на бројката 100, со три жолти свеќички.
Петра Харис, која се грижи за Фред, вели дека тој сака да биде во близина на жени и оти знае многу зборови. Сепак, најомилени фрази му се „Здраво Фред“ и „Поли сака крекер“. Таа вели дека Фред не сака да излегува од својот кафез. Папагалот пред да стане дел од резерватот бил домашен миленик, сè додоека не му починал сопственикот.
Повеќето какадуа не ја доживуваат стотата година. Овие птици во дивината живеат околу 40 години, а на 70 години се сметаат за особено стари.