Во престрет на велигденските празници, Јавното сообраќајно претпријатие (ЈСП) ја информира јавноста дека возилата од јавниот превоз ќе сообраќаат според изменет возен ред.
Утре сите автобуси ќе сообраќаат по неделен возен ред, освен на линиите 18А, 32, 47А, 51, 55, 55В, 56, 56А, 70, 74, 81, 118, 160 и 164 кои ќе се движат според саботниот возен ред. Во текот на сабота, недела и понеделник сите автобуси ќе се движат според неделниот возен ред.
За продажба на билети, од ЈСП посочуваат дека билетарниците и центрите за персонализација ќе работат само во сабота, додека во петок, недела и понеделник нема да работат.
Жичарницата на Средно Водно ќе работи со обично работно време, од 10 до 18 часот, во текот на празничните денови, а нема да работи во вторник.
Линиите 25 (Транспортен центар-Средно Водно), 25А (Автомакедонија-Средно Водно) и 25Б (Дом на печат-Средно Водно) ќе се движат според неделниот возен ред.
Паркирањето во Центар бесплатно
Општина Центар соопшти дека за време на празничниот продолжен викенд паркирањето ќе биде бесплатно за сите граѓани на сите паркинг места во сопственост на ЈП Паркинзи на Општина Центар, освен во сабота поради тоа што е работен ден согласно програмата за неработни денови на Министерството за труд и социјална политика.
Депото на “Пајак” на ЈП ПОЦ ќе биде достапно 24/7 за време на празниците, а редовната наплата за паркирање и издавање на договори ќе продолжи во вторник со вообичаено работно време во Дирекцијата на ЈП ПОЦ.
Согласно со Законот за празниците на РМ, 14 април (петок) 2023 година, Велики Петок, петок пред Велигден, е неработен ден за граѓаните од православна вероисповед во Република Северна Македонија.
Понеделник, вториот ден на Велигден според православниот календар, е неработен ден за сите граѓани на Република Северна Македонија.