Современиот македонски поет Славе Ѓорѓо Димоски објави нова поетска книга, „Јазичен триптихон“, чиј издавач е „ПМВ Публикации“ од Скопје.
Во книгата се поместени и три искажувања од Венко Андоновски, Санде Стојчевски и од Наташа Аврамовска.
Книгата содржи пет подолги лирско-епски песни, од кои три го сочинуват „Јазичниот триптихон“ и две делот „Додаток“. Предмет на пеење е јазикот како прапочеток на сè, а особено поетскиот јазик како највисок израз на човечкиот цивилизациски дух. Во „Додаток“ се појавуваат ликовите на Каин, првиот библиски братоубиец и на Александар.
Ѓорѓо Димоски досега објавил 11 авторски книги: „Гравири“, „Проект“, „Студен порив“, „Последните ракописи“, „Спореден пат“, „Предмети и аргументи“, „Форми на страста“, „Темно место“, „Мерач на зборовите“, „Хаику на разгледници“.
Објавени се два пообемни избори од неговата поезија, целокупната негова поезија под наслов „Поезија/ ткаења“ и 12 книги на други јазици.