Лидерот на ВМРО-ДПМНЕ, Никола Груевски, денеска во Куманово соопшти дека за десет дена ќе почне изборот на изведувач за градежните работи за изградба на ургентен центар во Куманово, а до крајот на годината ќе почне и самата изградба.
Груевски соопшти дека главниот проект е готов и оти се завршени сите подготвителни работи за изградбата на објектот, што ќе чини околу 48 милиони денари.
Тој, исто така, соопшти дека Министерството за здравство вчера објавило конкурс за набавка на три мамографи, од кои еден за Куманово, еден за Крива Паланка и еден за Битола.
– За набавката на овие три мамографи во овие три града предвидени се во буџетот повеќе од 300.000 евра за да се набават и да се стават на располагање на лекарите и на пациентите – рече Груевски.
За време на посетата на Куманово, лидерот на ВМРО-ДПМНЕ обелодени дека се планира изградба на две градинки во општина Куманово до крајот на 2017 година. Тој рече дека постапката за едната градинка, која ќе има капацитет за 80 до 90 деца, е почната, но оти наишле на одредени формални пречки кои се обидуваат да ги отстранат. Другата градинка е во кумановската населба Гоце Делчев, каде се планира проширување за нов капацитет од 50 деца.