Денеска во 13 часот и утре во 18 часот ќе биде прикажан македонскиот филм „М“ на Вардан Тозија, во рамки на филмскиот фестивал Котбус, кој е еден од водечките меѓународни фестивали на источноевропскиот филм. Како што велат организаторите, фестивалот сака да прикажува добри филмови и да им даде пристап до пазарот, а цели и кон тоа да ги зајакне талентите, да предизвика љубопитност, да ги доведе во прашање вообичаените клишеа и да го промовира дијалогот помеѓу филмаџиите.
Сценариото за „М“ е на Вардан Тозија и Даријан Пејовски, а продуценти се Дарко Попов и Вардан Тозија. Филмот е работен со копродуценти од Франција, Хрватска, Косово и Лукембург.
Актерската екипа ја сочинуваат: Матеј Сиваков, Сашко Коцев, Александар Ничовски, Камка Тоциновски, Бојана Грегориќ Вејзовиќ, Верица Недеска, Владимир Тулиев, Оливер Митковски, Мирослав Петковиќ, Жаклина Петровска, Благоја Веселинов, Борис Дамовски, Јамина Билаловиќ, Михајло Миленковски и Тони Михајловски.
Кинематографер е Владимир Самоиловски, костимите се дело на Андреа Кустовиќ и Николина Костаншек, музиката е на реномираниот филмски композитор Натаниел Бергес (Nathanaël Bergèse) во соработка со францускиот ко-продуцент „Les Contes Modernes“.
Филмот е поддржан од Агенција за филм, Хрватскиот аудио визуелен центар, Косово филм центар, SACEM (Франција) ТВ ТелМа (Македонија), Agora Co-Production Market at IFF Thessaloniki 2019 ScriptTeast 2020 – Script Development Workshop (Poland, Germany, France) Sofia Meetings (WiP) at IFF Sofia 2020.
Кај нас во моментов, „М“ се прикажува во Кинотека.