Три лица на возраст од 16 до 20 години се одговорни за прскање со непознат спреј во училница во средното училиште „Арсени Јовков“, по што 13 ученици и еден наставник беа хоспитализирани.
Лицата се товарат за предизвикување општа опасност и по целосното заокружување на истрагата, против нив ќе бидат поднесени соодветни кривични пријави, соопшти портпаролот на МВР, Иво Котевски.
Според него, две од лицата се ученици во „Арсени Јовков“, а едно минатата година завршило во ова училиште.
– Сè уште се работи на целосно документиранње на случајот. Според досегашните сознанија, трите лица дошле до т.н. пепер-спреј, со кој најпрвин се прскале меѓу себе, а потоа го употребувале и во ходниците и во просториите на училиштето – рече Котевски.
Министерот за образование и наука, Абдилаќим Адеми, е задоволен што полицијата бргу ги открила сторителите и апелираше до директорите овој случај да им биде поука за повисоко ниво на безбедност во училиштата.
– Апелирам до сите директори на основни и на средни училишта во Македонија повеќе да работат и со родителите, и со наставниците, и со учениците, но и со лицата што ги имаат ангажирано за обезбедување на училиштата – изјави Адеми.