Десет железнички станици во Макеоднија ќе се реконструираат и ќе добијат нов лик, а проектот државата ќе ја чини 2,2 милиони евра.
– Прва железничка станица што ќе се рехабилитира е железничката станица во Прилеп. За неа веќе издадовме одобрение за градење и слободно можам да кажам дека со ова, практично, почнуваме еден инвестициски зафат со кој комплетно ќе ги реконстурираме сите железнички станици на Коридор 10 со најдобрите практични решенија – изјави министерот за транспорт и врски, Владо Мисајловски.
Проектот на Министерството за транспорт и врски опфаќа целосна реконструкција на сите главни елементи на станиците. Според најавите, целосно ќе бидат заменети покривите и подовите, ќе се санираат фасадите и внатрешните ѕидови, ќе биде поставена нова термичка изолација и ќе се изградат нови тоалети.
Комплетно ќе се сменат водоводната и електричната инсталација – вклучувајќи ги и внатрешното и надворешното осветлување, ќе се постават системи за греење и за ладење, за противпожарна заштита, патнички информативен систем, а ќе се подобрат и пристапноста за товарен транспорт и за лицата со намалена подвижност, достапноста и поврзувањето со патниот транспорт.
Во тек се активности за обнова и на Железничката станица во Скопје, за што инвестицијата е 2,9 милиони евра.