Демократскиот сојуз повикува на разумно однесување од сите граѓани без разлика на политичката и на етничката припадност во врска со актуелните тензии во Бутел.
ДС бара лидерите на ВМРО-ДПМНЕ и на ДУИ, Никола Груевски и Али Ахмети, да излезат на местото каде што се поставени шатори и има насобрани лица кои насилно ги срушија темелите каде треба да се постави крст, да повикаат на разум и со тоа да се спречат можни судири со тешки последици по стабилноста, мирот и по безбедноста на државата.
„Поставувањето на национални и на верски симболи за да се печалат предизборни поени е крајно неодговорно и против интересите на граѓаните и на државата. Наместо протести и судири помеѓу партиските војници, инсистираме, за поставување на двоглавиот орел и на крстот да одлучат државните институции. Го повикуваме МВР да спречи директен контакт помеѓу спротивставените страни и насилно однесување“, реагираат од ДС.