Вчера, околу 14 часот, во полициската станица во Тетово, била пријавена расправија помеѓу двајца тетовци и две момчиња од селото Слатино, која прераснала во физичка пресметка со метални и со дрвени палки, информираат од полицијата.
Според информациите, во тепачката учествувале тетовците Б.Ш. (24) и В.Н. (19) од една и Џ.С. (23) и неговиот врсник Д.С. од селото Слатино, од друга страна.
Во тепачката, според полицијата, В.Н. употребил метална палка со која го удрил Џ.С. по глава, а потоа со Б.Ш. побегнале од местото.
Насилството продолжило во филијалата на Стопанска банка во Тетово, каде во меѓусебната пресметка Б.Ш. и двајцата слатинци оштетиле и дел од инвентарот на банката.
Од полицијата информираат дека четирите момчиња биле приведени и по целосното расчистување и документирање на случајот, против нив ќе бидат поднесени соодветни пријави.