Претседателот на Република Македонија, Ѓорге Иванов, на сите граѓани им го честитам празникот 11 Октомври – Денот на народното востание, ден на македонската борба за слобода, значаен ден за македонската државност.
– Одбележувајќи го овој значаен датум од македонската понова историја, им оддаваме почит на сите учесници во Народноослободителната борба која го симболизира македонскиот непокор и вековитиот стремеж за слобода. Во Прилеп и во Куманово почна борбата на нашите дедовци и татковци, продолжувачи на делото на славните илинденци, кои со своите дела ни оставија обврска и аманет за зачувување на независноста и на самостојноста на Република Македонија натопена во крвта на паднатите херои – рече претседателот.
Иванов рече дека само сплотени и обединети ќе истраеме, бранејќи ги највисоките македонски интереси пред кои сме соочени денес.
– Предизвиците ќе ги совладаме како и во минатото, еден до друг, сите етнички заедници во земјава, Македонци и Албанци, Турци, Срби, Бoшњаци, Власи и Роми. Нашата традиција за соживот е нашето најдобро оружје во борбата за успешна и просперитетна држава. Затоа ве повикувам сите заедно, сплотени, да ја градиме Република Македонија како дел од големото европско и светско цивилизациско семејство на кое природно припаѓаме и каде ја гледаме нашата иднина – рече Иванов.