Почина актерот Чадвик Бозман, најпознат по неговата улога на суперхеројот Црниот Пантер (Black Panther) во истоимениот блокбастер од Марвел. На неговите профили на социјалните медиуми беше објавена официјална порака од неговиот тим дека Чадвик починал вечерта на 28 Август, на 43-годишна возраст, по 4-годишна борба со ракот, во тајност.
Иако Чадвик се борел со болеста веќе 4 години, за ова знаеле само мал круг на луѓе, а за светот оваа вест одекна како огромно изненадување. Холивуд жали за својот колега, кој важи за еден од најпочитуваните актери на нашето време. Речиси да нема јавна личност која не оддаде почит за прераното заминување на актерот.
Во април годинава, фановите забележале дека нешто се случува со актерот одкако тој на својот инстаграм профил објавил видео каде се забележува дека актерот е значително ослабен. Ова видео ја загрижи јавноста, но набрзо фановите заклучиле дека падот на неговата телесна тежина веројатно се должи на подготовка за нова улога во филм за која е потребно да изгледа послабо. За жал се покажа дека тоа не е вистина.
View this post on InstagramA post shared by Chadwick Boseman (@chadwickboseman) on
По веста за неговата смрт, јавноста се потсети на ова видео во кое Чадвик зборува за две дечиња кои починале од рак, со кои тој комуницирал во текот на снимањето на Црниот Пантер. Во видеото актерот станува емотивен додека ја раскажува приказната, а според датумот на интервјуто може да се заклучи дека во тој период тој веќе знаел дека и тој самиот боледува од рак.
Неколку хаштази поврзани со смртта на актерот веќе се трендинг на Твитер, а фановите побрзаа да ја искажат својата жал, меѓу другото, барајќи од Марвел да не ставаат друг актер во улогата на Кралот Т’Чала во Црниот Пантер.