Со 206 гласа „за“, ниту еден против и ниту еден воздржан, денеска Народното собрание на Бугарија ја усвои декларацијата за договорот за пријателство, добрососедство и за соработка со Република Македонија.
Како што јавуваат бугарските медиуми, бугарското собрание позитивно ги оценило напорите на двете држави за финализирање на преговорите за договорот за добрососедство и ја истакнало потребата за развој на соработка во сите области на основа на меѓусебна доверба, разбирање и почитување на интересите на двете земји.
Бугарското собрание изразило подготвеност за итно ратификување на договорот по неговото потпишување и истакнало дека европската перспектива на Македонија е гаранција за безбедноста, стабилноста и за просперитетот на регионот.