Љубе Бошкоски доби ослободителна пресуда во повтореното судење за случајот „Кампања“, во кој беше обвинет за нелегално финансирање на изборите како лидер на партијата Обединети за Македонија, во 2011 година.
Бошкоски беше осуден дека земал пари за кампањата од странски државјанин кој во процесот беше и еден од клучните сведоци. За овој случај, Бошкоски веќе одлежа пет години затвор во „Идризово“, а предметот беше вратен на повторно судење по негово барање, откако Европскиот суд за човекови права во Стразбур пресуди дека му биле прекршени правата на фер судење во однос на повикување и испитување на сведоци.
„Од денес па натаму сум можеби единствен на балканските простори што помина 11 години неправедно во затвор. Времето никој не може да ми го врати, но ги охрабрувам сите судии да ги земат предвид сите докази, а не да влегува политиката во судниците“, изјави тој по изрекувањето на пресудата и додаде дека моментално ќе се повлече од политиката поради приватни причини.