Министерот за внатрешни работи, Оливер Андонов, кој дојде на функција вчера, денеска веќе ја поднесе својата оставка до премиерот Емил Димитриев.
За време на неговиот мандат од неколку часа, успеа само да се слика во министерскиот кабинет за официјалната веб-страница на МВР.
Андонов дојде на позицијата министер откако претходниот министер, Митко Чавков, вчера поднесе оставка и од Владата ќе биде назначен за директор на Бирото за јавна безбедност (БЈБ).
Синоќа Собранието со 65 гласа „за“ и ниту еден против, го избра Андонов за нов министер за внатрешни работи. За време на гласањето, во салата не беа присутни пратениците од опозицијата.
Претходно, премиерот Емил Димитриев пред пратениците образложи дека станува збор за личност која има работено во Армијата на Република Македонија и во Министерството за внатрешни работи, а во науката се има посветено на полето на безбедноста.