Здружението на новинарите на Македонија (ЗНМ) го осуди вербалниот и физички напад врз снимателот на ТВ 24, Иван Камчев. Напаѓачот ја оштетил и неговата опрема, информираше здружението.
Камчев, враќајќи се од денешно снимање, со колега од МРТВ на патот Градско-Прилеп кај Росоман биле сведоци на сообраќајна несреќа. Во обид да го документира настанот, снимателот Камчев бил нападнат вербално, а потоа и физички.
„Само што почнав да снимам инсерти, лицето се доближи до мене почна да вика предавници новинари, само некакви права барате и ни се обрати со погрдни зборови. Неколку пати замавна по мене и еднаш успеа да го погоди сталакот и ја оштети камерата“, изјавил Камчев во телефонски разговор кога го пријавил случајот во ЗНМ.
Од здружението велат дека случајот е пријавен и во Министерството за внатрешни работи (МВР), од каде добиле информација оти по пријавата се преземени мерки за негово расчистување.