Апелацискиот суд Скопје вторпат ја укинал првостепената пресуда за случајот „Змиско око 2“ и го вратил предметот на повторно судење во Кривичниот суд, соопшти денеска Основниот суд Скопје 1.
Одлуката Апелацискиот суд ја донел на седници одржани на 19 и на 22 февруари оваа година, кога биле разгледувани жалбите поднесени од 53 обвинети, како и жалбата на Обвинителството за организиран криминал и корупција.
Апелација ги уважила жалбите на обвинетите и делумно жалбата на Обвинителството.
„Постапувајќи по изјавените жалби, Апелацискиот суд одржал јавна седница на 19 февруари и на 22 февруари 2016 година, на која утврдил дека во првостепената пресуда нецелосно е утврдена фактичката состојба, односно дека обжалената пресуда во осудителниот и на ослободителниот дел од став 1, точка 1 и став 3 содржат недостатоци поради кои не може во целост да се провери нејзината правилност, а изреката на пресудата е недоволно јасна, заради што Апелацискиот суд ги уважил жалбите и предметот го врати на повторно судење со упатства да се отстранат недостатоците. Во однос на жалбата на Обвинителството за осудителниот дел од став 1 на пресудата, Апелацискиот суд сметал дека таа е беспредметна“, стои во соопштението на Основниот суд Скопје 1.
Полициската акцијата „Змиско око 2“ беше спроведена на средната на 2008 година, а во неа, како и во претходната „Змисоко око 1“, беа уапсени инкасатори, контролори и раководители од Јавното претпријатие „Македонија пат“ под сомневање дека здружени во група наплаќале патарина со фалсификувани сметки или воопшто не издавале сметки, а парите ги земале за себе.