Лидерот на СДСМ, Зоран Заев, рече дека неговото присуство на денешната седница на Советот за безбедност не значи дека тој и опозицијата даваат легитимитет за она што државните институции го правеле изминатите неколку години, а особено последните неколку месеци.
– Нашите ставови за капацитетот и за легитимитетот на оваа власт се познати, од нив не отстапуваме. Но, денеска имаме друг приоритет, да се спречи процесот кој очигледно води кон дестабилизација на државата и кон загрозување на безбедноста на граѓаните. Моето присуство на седницата на Советот за безбедност е исклучиво поради загриженоста за безбедносната состојба во државата. На седницата, во име на граѓаните, ќе барам објаснување кој, зошто и со каква цел ја дестабилизира Македонија, дали воопшто кризата во Куманово е завршена и дали е точно дека и во некои други региони има инфилтрирано вооружени групи? Дали безбедносните служби знаеле од порано за оваа вооружена група и од кога? Исто така, од суштинско значење е дали овие луѓе имаат каков било план и стратегија за смирување на состојбата и за спречување можна ескалација – рече Заев.