Вработен во „Македонски железници“, утрово, дваесетина минути по полноќ, во велешката полиција пријавил дека товарниот воз кој сообраќал на релација Трубарево-Гевгелија, транзит за Солун, кај место Згрополци, удрил во непознато лице кое се наоѓало на шините.
Јавен обвинител и увидна екипа од велешката полиција извршиле увид на местото, каде што пронашле дел од телото, обувки, облека и траги од крв и ткиво.
Неколку часа подоцна, околу 06.20 часот, петмина авганистански државјани, еден маж на возраст од 44 години и четири малолетни лица, во полициското одделение за обезбедување возови во Скопје пријавиле дека во раните утрински часови, додека се движеле пеш по железничката пруга Градско-Згрополци, наишол товарен воз и едно лице било прегазено. Исто така, Авганистанецот пријавил дека телото го покрил со камења од пругата и продолжил заедно со четирите деца да се движи пеш кон Скопје. Полицијата презема мерки за целосно расветлување на случајот и за утврдување на идентитетот на починатото лице.