Во светот годишно околу 1,35 милиони луѓе го губат животот во сообраќајни незгоди, а околу 50 милиони лица се здобиваат со повреди. Во Северна Македонија, минатата година 124 лица го загубиле животот во сообраќајна несреќа, додека 3.834 биле повредени, информираше Републичкиот совет за безбедност на сообраќајот на патиштата (РСБСП) по повод Светскиот ден на сеќавање на жртвите од сообраќајни несреќи.
Овој ден се одбележува од 1993 година, а во 2005 година ОН го прогласи за светски ден кој се одбележува секогаш во денот недела од третата седмица во ноември.
Според податоците за 2023 година, од РСБСП велат дека до август бројот на загинати во сообраќајни незгоди на македонските патишта изнесува 85, додека бројот на повредени е 2.805 – што е значително помалку во споредба со последните четири години.
„Сепак, според светската визија за нула жртви во сообраќајот, сите заеднички треба да преземаме суштински активности за зголемување на безбедноста на сообраќајот на патиштата“, велат од Советот.
Светскиот ден на сеќавање на жртвите од сообраќајни незгоди е ден кога релевантни институции и организации од целиот свет се ангажираат за да се потсети јавноста на милионите лица кои загинале или биле повредени во сообраќајни незгоди, да им се даде помен на истите, но и за да се подигне свеста кај учесниците во сообраќајот за последиците од сообраќајните незгоди со цел да се намали бројот на загинати и повредени.
„Овој ден е посветен и на членовите на семејствата на загинатите и повредените во сообраќајни незгоди, како и на сите оние кои се соочуваат со физички или психички последици од сообраќајни незгоди, а признание им се оддава и на службите за итна медицинска помош, противпожарните единици и сиот медицински персонал, но и на сите општествени чинители кои пружаат помош на повредените и на семејствата на загинатите и повредените лица“, велат од РСБСП.
Од таму апелираат возачите на возат одговорно и безбедно и да го дадат својот придонес за намалување на сообраќајните незгоди.