Уставниот суд на Република Македонија денеска се прогласи за ненадлежен и ја отфрли иницијативата за оценување на уставноста и на законитоста на одлуката за поставување крст во општина Бутел. Одлуката за давање согласност за поставување урбана опрема на подрачјето на општина Бутел е донесена во февруари годинава од Советот на Општината. Иницијативата беше поднесена од Движење за реформи – Албанска демократска партија Тетово.
Од Судот појаснуваат дека ја отфрлиле иницијативата за одлуката за поставување урбана опрема во општина Бутел, бидејќи не е општ пропис, туку е врзан за конкретен објект, предмет, односно работа. Проектот за поставување на крстот е на Светскиот македонски конгрес.
Судот на денешната седница го укина членот 71, став 5 од Законот за кривична постапка, кој предвидува за кривични дела за кои може да се изрече казна затвор во траење од најмалку 10 години бранител да може да биде адвокат со искуство од најмалку пет години по положување на правосудниот испит.
Досегашниот генерален секретар на Уставниот суд, Оливера Филиповска, информира дека на почетокот на денешната седница судиите се договориле деновиве да изберат нов генерален секретар, бидејќи на 1 септември ѝ завршил мандатот.
Генерален секретар избираат судиите од редот на државните советници на Уставниот суд на Република Македонија. За да биде избран генерален секретар, како што информират од судот, потребни се пет гласа од девет судии.