Британскиот весник „Тајмс“ ја прогласи германската канцеларка Ангела Меркел за личност на годината.
Во образложението на својата одлука, весникот ја истакнува централната улога на Меркел во зачувувањето на стабилноста во Европа.
Според оценките на „Тајмс“, германската канцеларка е најзаслужна што не дојде до поголеми геополитички нарушувања по руската агресија во Источна Европа.
Германската канцеларка, која во 2016 година треба да одлучи дали на наредните избори ќе се обиде да го добие и четвртиот мандат, е избрана за личност на годината, пред сè, заради тоа што ја презеде контролата врз тешките преговори со претседателот на Русија, Владимир Путин, по анексијата на Крим.
Меркел успеа да се наметне како важен фактор во година кога односите меѓу Истокот и Западот дојдоа до точка на пукање, во најопасната геополитичка криза по Студената војна, наведува „Тајмс“.
„Германската канцеларка е жена која ни е потребна во светот полн со опасни мажи“, стои во образложението.