Советот на Агенцијата за аудио и аудиовизуелни медиумски услуги, на денешната седница ја усвоил Нацрт-методологијата за „мониторинг на изборното медиумско претставување преку радио и телевизиските програмски сервиси за предвремените парламентарни избори, кои ќе се одржат во 2016 година“, соопштија попладнево од Агенцијата.
Оттаму информираат дека заради обезбедување на максимална транспарентност на процесот на усвојување на документот во финална верзија, како и да се даде можност на сите релевантни субјекти да се вклучат во јавната расправа и преку отворена дебата да дадат свој придонес, Агенцијата за аудио и аудиовизуелни медиумски услуги на 23 август, во 12 часот ќе организира состанок на кој ќе ја презентира Нацрт-методологијата.
„Агенцијата упати повик до сите радиодифузери, политички партии, здруженија на новинари да земат активно учество на овој состанок и да ги искажат своите предлози, мислења и ставови, поврзани со текстот на Нацрт-методологијата“, стои во соопштението на АВМУ.