Македонија Притвор за тетовец осомничен дека силувал 14-годишно девојче

Притвор за тетовец осомничен дека силувал 14-годишно девојче

Според обвинителството, осомничениот на 12 април годинава, во близина на маркет кај старите згради на Државниот универзитет во Тетово, со употреба на сила и закана силувал 14-годишно девојче

Фото: The image was posted by Anemone123 on Pixabay

Тетовското јавно обвинителство донело Наредба за спроведување истрага против 19-годишник за кривично дело „силување на дете кое не наполнило 15 години“, според член 188 од Кривичниот законик.

Според обвинителството, осомничениот на 12 април годинава, во близина на маркет кај старите згради на Државниот универзитет во Тетово, со употреба на сила и закана силувал 14-годишно девојче. Тој, заедно со уште едно непознато лице, ја пречекале жртвата во една уличка додека одела кон маркетот. Осомничениот, инаку нејзин сосед, ја повлекол за раката кон паркирано возило во близина. Другото лице го отклучило автомобилот, по што осомничениот го удрил девојчето по лицето и ја натерал да седне на задното седиште.

„Со возилото управувало непознатото лице, кое ги заклучило вратите и ги одвело 200 метри подалеку, по што го паркирало возилото и излегло. На задното седиште останале осомничениот и оштетената, а тој со употреба на сила го принудил девојчето на полови дејствија. Потоа му се јавил на непознатото лице и заедно со автомобилот ја вратиле жртвата од местото каде што ја зеле. Осомничениот ѝ се заканил дека ќе ја убие доколку каже некому за настанот“, велат од обвинителството.

Надлежниот јавен обвинител до судијата на претходна постапка во тетовскиот суд доставил предлог за определување притвор за осомниченото лице, оценувајќи дека тој би можел да избега, да влијае врз сведокот/жртвата или да го повтори делото.

Судот го прифатил предлогот на обвинителството и на осомничениот му определил 30-дневен притвор.