Претседателот на Обединетата македонска дијаспора, Методија Колоски, се сретна во Вашингтон со Брајан Хојт Ји, заменик помошник државен секретар за европски и евроазиски прашања во американскиот Стејт департман.
Колоски и Хојт Ји разговарале за претстојните предвремени парламентарни избори во Македонија, што ќе се одржат на 11 декември и за македонските евро-атлантски интеграции.
„Претседателот на ОМД, Колоски, и заменикот помошник на државниот секретар, Хојт Ји, разговараа за претстојните предвремени парламентарни избори во Македонија, што ќе се одржат на 11 декември, а кои се клучен тест за иднината на Македонија, особено во евроатлантските интеграции. Двајцата се согласија дека владеењето на правото, доверба во институциите и независно судство се од најголема важност – области што ОМД смета дека се најголемата пречка за идниот напредок на Република Македонија, за што ОМД организираше конференции во Вашингтон и во Скопје“, информираат од ОМД.
ОМД ги охрабрува Американците со македонско потекло да се вклучат активно во продолжување на стратешките односи на САД и на Македонија.